О Мордовии

Мордовиять колга

1930 кизонь 10 январьста ВЦИК-ть Президиумоц примась постановления Мордовскяй автономнай республикать пуроптоманц колга.

Пингсь, кона етась 1930 кизонь январьста сявомок, няфтезе, што именна автономиять эвондамац нинге сядонга кемоста пуроптозе мокшэрзянь народть Россиянь лама национальностень семьять мархта и панчсь эсь лацонь возможностть культурнай традициятнень ванфнеманкса и республикаса эряй сембе нароттнень потенциалснон касфнеманкса.

Мордовия Республикань Оцюнять аф лама пингс тевонзон тиендисна Артём Алексеевич Здунов

Тежянь веконь кувалмоса мокшэрзянь народть судьбац аф явфтовиста сотнефоль Россиять судьбанц мархта. Сире пингста сявомок сон ульсь виикс кода ратнай тевса, стане и крестьянскяй трудса и промысласа. Минь аф юкснесаськ содаф ломаненьконь, кинь судьбасна кемоста сотневсть мастороньконь мархта, кинь лемсна зрнянь букваса серматфт странаньконь и республикать летописьснонды. Синь девизсна фалу ульсь тяфтама: «Аньцек инголи! Аньцек Сяськома!»

Шарфты мяль ся, што республиканьконь 90 кизонь топодеманц минь васьфнесаськ Великай Отечественнай войнаса Сяськомать 75 кизонь топодеманц мархта. Ся стака кизотнень Мордовиянь народсь няфтсь оцю патриотизма и эсь прянь аф ужяльдема, героизма. Республикать территорияса пуроптфоль аф фкя оцю воинскяй подразделения, конатнень еткса 326-це Рославльскяй стрелковай дивизиясь. 100 тежяньда лама земляконьке казьфтольхть боевой орденца и медальса, 109-ти максф Советскяй Союзонь Героень лемсь, 25-сь арасть Славань орденонь полнай кавалеркс.

Мордовскяй автономиять пуроптомста етаф пингста путфоль республиканьконь социально-экономическяй потенциалонц юроц. Мордовияса эвондасть оцю промышленнай предприятият, транспортнай узелхт, велень хозяйствась сатсь рекорднай сатфкст. Башка мяль шарфтфоль светонь источниконь, кабельнай продукциянь производствати. «Арепливир» препаратсь, кона аноклаф «Биохимик» саранскяй предприятияса, арась фкя инь васенце лекарствакс, кона ноляви тевс коронавируснай инфекциять пчкафнеманкса. Виияфневсь микроэлектроникась и приборостроениясь. Мордовиясь арась силовой полупроводниковай техникать производстванц коряс и светотехническяй промышленностень центракс, а республикась арась образовательнай и научнай оцю центракс.

Минь республиканьке фалу шарфтсь эсь лангозонза мяль межконфессиональнай терпимостть и межнациональнай ладямать мархта. Обществаса согласиять удалси сатнемс Русскяй Православнай Церькавть, традиционнай сембе религиятнень представительснон мархта марстонь работань вятнезь. Оцю мяль минь шарфнетяма общероссийскяй гражданскяй идентичностть пуропнемаса мокшэрзянь народть вастонцты, мокшэрзянь кяльхнень, национальнай культурать и койхнень-обуцятнень ванфнемаснонды, финно-угорскяй сообществать мархта республикать сотксонзон келепнемаснонды.

Башка васта Мордовиять тяниень пингонь историясонза занци Российскяй Федерациянь Президентсь В.В.Путин. Сон ламоксть сашендсь республиказонк, лац содасы, кода ащихть тефне Мордовияса, фалу кирнесы ширеньконь. Именна сонь личнай участиянц пингста республикаса эряфс етафтфт вииякшнемань оцю программат.


Марса Россиять мархта, марса – Россия!

Мокшэрзянь народть историяц эсь лацонне и козя, сон аф явфтовиста сотнеф Россиять историянц мархта. Лама веконь кувалмоса марса лия нароттнень мархта, конат эряйхть странаса, лопаня мельге лопаня пуропневсь сонь летописец. Тяка пингть мокшэрзянь народть, кода и любой лия народть историяц, путнесы эсь путксонц Российскяй государствать кемокснеманцты, виияфнеманцты.

Мокшэрзятнень колга васенце историческяй свидетельствась канневи минь эраньконь VI веконцты. Византийскяй епископть Иорданонь «О происхождении и деянии готов» трудсонза мокшэрзятне азфт пляматнень  лувксса, конат паннихть дацькя готскяй корольти Германарихонди. Этнонимсь канневи ирано-скифскяй кяльхненди. Мокшэрзянь этность субэтносонза – эрьзятне и мокшетне.

Нинге 16 векста сявомок Мордовиянь эряйхне марса рузонь казакнень мархта аралакшнезь Оцю засечнай чертать лангса Россиять юго-восточнай границанзон, примсесть участия Российскяй государствать оцюдонга оцю территориянзон заселенияса.

Республикань инь сире ошсь, Темниковась, пуроптф 1536 кизоня. Сон служась эсь лацонь опорнай пунктокс. Тяконь лувксса и тяста государевань лицатне, стрелецне, казакне, служивай татархне келепнезь российскяй державать границанзон. Тя канневи и лия содаф населеннай пункттненди – Саранскяйти, Инсарти, Атемарти и лиятненди. Эряви азомс, республикать столицац – Саранскяйсь – пуроптф 1641 кизоня.

2.jpg

1612 кизоня, ся пингть, мзярда народнай ополчениянь основной вийхне нолязь воляс государстваньконь столицанц, тяса, тяниень пингонь Мордовиять территорияса, сонь эряенза ащесть Россиять рубежензон араламаса. Кочевникнень мяльсноль розарямс аф аралаф Нижегородскяй модатнень, штоба меле эрьхтемс ополчениять копорьс. Именна эста мокшэрзянь князсь Баюш Разгильдеев эсь войсканц мархта машфтозе ногайскяй ордать Чукалы велеть маласа, кона тяни ащи Большеигнатовскяй районца.

Мокшэрзянь народсь марса лия нароттнень мархта участвондась ополчениять эса. А мокшэрзянь велетне, кода пачфнихть ся пингонь историческяй источникне, эрь тягловай (податнай) участкаста кочкасть ополченияти кафта четвертень пинем и цалковаень тишенкса («сембоц 538 четверть пинем и ярмакта 180 цалковай 32 алтынь ½ ярмак» - ся пингть тя ульсь аф кржа).

крае.jpg

1612 кизонь событиятне няфнесазь, што ниле сядот кизода ламода тяда инголе странати стака пингста народсь, няфтемок гражданскяй марстоньши, сявозе эсь лангозонза странать судьбанц инкса ответственностть, маштсь ванфтомс сонь срадомада-каладомада.

Мордовиянь эряйхненди башка мала аф сяськови адмиралсь Федор Ушаков, Мордовиять небеснай покровителец. Эрямань мекольце 8 кизонзон сон етафтозень мокшэрзянь масторса Алексеевка велеса эсь усадьбасонза. Эсь средстванзон лангс панчсь Темниковаса госпиталь, тись лама пожертвования 1812 кизонь Отечественнай войнать пингста. Калмамс эсь прянц Ушаков мярьгсь Санаксарьса.

erzya_1.jpg

Мокшэрзянь народть государственностенц ладямац канневи 1920-1930 кизотненди. 1928 кизонь июльста пуроптфоль Мордовскяй национальнай округсь, кучкац ладяфоль Саранск ошса.

1930 кизонь 10 январсь – эсь лацонь дата Мордовиять летописьса. Тя шиня ВЦИК-ть постановлениянц мархта Мордовскяй округсь тифоль Мордовскяй автономнай областекс. Тяфта васенцеда мокшэрзятне, фкя инь оцю, государствообразующай народть эвондась сонцень автономияц Российскяй Федерациять лувксса. Тя решениясь лездсь виияфтомс национальнай кяльхнень и нароттнень культураснон, конат тяса эряйхть, путсь юр тяниень социально-экономическяй инфраструктурати, занясь оцю васта мокшэрзянь государственностть ладямаса.

erzya_5.jpg

Сяда товолдонь мяляфтови датакс крайть историяса ули кода лувомс 1934 кизонь 20 декабрть, мзярда автономнай областсь тифоль Мордовскяй Автономнай Советскяй Социалистическяй Республикакс.

Великай Отечественнай войнась ульсь аф аньцек седиень ацергофты, но и героическяй пингокс Россиять историяса. Марса лия нароттнень мархта гитлеровскяй Германиять срафтоманцты путкс путсть и Мордовиянь ломаттне. Апак учентт воинкоматста повесткат, сядот и сядот ломанць мольсть призывной пункттненди, эняльдсть прважамс синь фронту.

Отечествань доблестнай аралайхнень еткса ульсть 246 тежяньда лама земляконьке, конат сембе фронттнень эса тюремаса няфтсть афкуксонь героень подвигт. Мордовиянь 110 тежянь ломанць казьфт боевой орденца и медальса, 124 ломанти, кинь судьбасна сембе пингс кемоста сотфт республиканьконь мархта, максф инь оцю казнесь – Советскяй Союзонь Героень лемсь, 31-сь – Славань орденонь полнай кавалерхт. Мордовиянь 134 тежяньда лама ломанць ашесть мрда куду тюремань паксяста.

Етай веконь 1950-1970 кизотнень путфоль юр республиканьконь социально-экономическяй потенциалонцты. Именна тя пингста Мордовияса эвондакшнихть оцю промышленнай предприятият. Приоритетнай отраслякс арасть светонь источниконь, кабельнай продукциянь, силовой полупроводниковай приборонь и преобразовательнай техникань производствась. Виияфневсь микроэлектроникась и приборостроениясь. Эста республикать столицац, Саранскяйсь, арась образовательнай и научнай оцю центракс.

Регионть историяса важнай пингокс арась 1957 кизоня Огаревонь лемса Мордовскяй государственнай университетть панжемац.

1959 кизоня Саранскяйса панчфтольхть Лодыгинонь лемса светонь источниконь Всесоюзнай научно-исследовательскяй институтсь, а стане жа силовой электроникань НИИ-сь. Синь разработкасна тиезь Мордовиять странань силовой полупроводниковай техникань и светотехническяй промышленностень центракс.

1994 кизонь январьста Верховнай Советть сессиянц пингста примафоль закон регионть Мордовия Республикакс лемдеманц колга.

Межнациональнай согласиянь атмосфераса етась  2007 кизоня Саранскяйса  «Шумбарт, Финно-угрия!» I Международнай фестивальсь, кона пуроптозень саммитс колма государствань – Россиянь, Венгриянь и Финляндиянь вятихнень, а стане жа марнек мирста финно-угорскяй народонь представительхнень.

2012 кизонь августста Саранскяйса етась торжественнай мероприятия, кона лемтьфоль знаменательнай датати – Российскяй государствань нароттнень мархта мокшэрзянь народть марса эрямаснон тежянь кизонь топодеманцты. Тя илать главнай смузец – китькстамс Россиянь нароттнень марстоньшиснон, ялгаксшиснон оцю значениянц. Торжестватнень эса примасть участия РФ-нь Президентсь В.В.Путин, Москувонь и семба Русень Патриархсь Кирилл, странаса ламоц содаф ломаттне.

2012 кизонь 29 сентябрьста Саранскяйсь азф ся ошнень лувксса, конат примасазь 2018 кизонь футболть коряс Миронь чемпионатть. Ся пингста сявомок республикаса ушедовсть оцю анокламат мундиальти, кона меле официальнайста азови инь цебярькс марнек историяса.

2018 кизось – эсь лацонь киза Мордовиять историяса. Тя афкукс историческяй события, кона ламода полафтозе республикань экономикать, социальнай сферать, тястонь эряйхнень менталитетснон. Саранскяйса эсь матчснон етафтозь Перунь и Даниянь, Колумбиянь и Япониянь, Португалиянь и Иранонь, Тунисонь и Панамань сборнайхне.

Миронь чемпионатсь Саранскяйса отмечафоль и историческяй государственнай визитса: Колумбиянь и Япониянь сборнайхнень матчснон ванома сашендсь японскяй принцессась Хисако Такамадо, футболонь Японскяй ассоциациять почетнай председателец. 102 кизоста тя ульсь японскяй императорскяй семьянь членть Россияв  васенце визитоц.

2019 кизонь июньцта «Мордовия Арена» стадионца васенцеда налхксь футболть коряс Россиянь сборнайсь. Васедемась аделавсь рекорднай счет мархта – 9:0 Станислав Черчесовонь подопечнаензон пользас. Официальнай даннайхнень коряс, матчть ванома сашендсть 42 241 болельщик, мезсь ащи рекорднай показателькс.

2021 кизонь февральть песта Мордовияв мрдафтфоль республикаса спортонь фкя инь кельгови видсь – ледовай спидвейсь. Мордовия Республикань Оцюнять аф лама пингс тевонзон тиендиснон Артём Здуновонь инициативанц коряс Саранскяйса етафтфтольхть показательнай выступленият эйть лангса мотогонкатнень коряс. Тяфтама триумфальнай мрдамась – кенярдема эрьти, кие мяляфтсы, кодама келиста содафокс ульсь миньцонк  спортонь тя видсь. Кда улихть тифт од условият, мокшэрзянь мотогонщикне, улема, тага кармайхть инь виикс планетаса!

Мордовиянь народти ули мезенкса марямс гордость. Сонь етай пингонь сяськондеманза – залог сай пингонь сатфксненди.

panorama_sar.jpg

Мокшэрзянь народсь российскяй социумса

Мокшэрзянь народсь фкя инь сиресь Россиянь нароттнень еткста. Сонь историяц может служамс цебярь примеркс этность виияфнемаса, кона тежяньда лама киза эряй Россияса и ашезе юмафта эсь этническяй шамаликонц, кяленц и культуранц. 9-10 векста сявомок мокшэрзянь народсь примсесь участия российскяй государственностть строямаса, сонь араламасонза и виияфнемасонза. Мокшэрзятне ашесть «юма» лия нароттнень еткса, сувасть лама национальностень единай народть лувксс и единай народть эса ванфтозь эсь прянц.

X векть ушетксста ушедовсь Древнерусскяй государствать рамкаса славяттнень мархта мокшэрзятнень шоворемасна. XI-XIII векнень мольфтевсь тя соткснень кемокснемасна, единай экономическяй и культурнай пространствать тиевомац, кона лоткафтфоль феодальнай раздробленностть и монгольскяй нашествиять мархта. Мокшэрзянь народть и рузонь княжестватнень политико-государственнай сотксснон сяда товолдонь кемокснемасна мольсь золотоордынскяй господствать каршес марстонь тюремаснон пингста. XIV-XV векнень Москуть перьфка пуромомста тиевсь Русскяй государствась. Мокшэрзянь народть оцюшка пяльксоц нинге марс пуромомань процессть ушедомста сувась Московскяй княжествать лувксс. XV веконь 80-це кизотнень тя процессь шумордавсь мокшэрзянь народть Русскяй централизованнай государствати суваманц мархта.

Сире пингонь эсь лацонь народсь занясь башка васта Россиять историяса. Мокшэрзянь народсь аф канневи доминирующай этносненди, но эсонза ульсть синь кой-кона ширесна. Мокшэрзятне марса русснень и татархнень мархта, ушедсть эряма оцюдонга оцю территорияса Балтикать эзда сявомок Тихай океанти молемс, Ферганскяй долинать эзда сявомок тундрати молемс, кемоста сотнемок эсь судьбаснон странаса эряй нароттнень мархта.

Аф фкя сядот киза мокшэрзянь народсь козякофнезе эсь культуранц лия нароттнень эзда.


Мордовиянь ломаттне

Мордовияса аф юкснихть содаф ломаттнень колга, кинь судьбасна кемоста сотневсть мастороньконь мархта. Мордовияннет унксонза Сембе Русень Патриархть Никононь. Минь масторсонк подвижничендась фкя инь содаф святойсь, духовнай мыслительсь Серафим Саровский. Мордовиять мархта кемоста сотфт Россиянь тяфтама содаф ломаттнень лемсна кода адмиралсь Федор Ушаков, полководецсь Петр Румянцев, поэтсь Александр Полежаев, историксь Василий Ключевский, просветительхне Макар Евсевьев и Захар Дорофеев, легендарнай певицась Лидия Русланова, татарскяй поэтсь Хади Такташ.

Странаньконь летописезонза зрнянь букваса серматфт тяфтама оцю военноначальникнень лемсна кода армиянь генералсь Максим Пуркаев, генерал-полковникне Иван Болдин, Сергей Горюнов, Советскяй Союзонь маршалсь Сергей Ахромеев. Ромодановскяй районца шачсть летчиксь Михаил Вельдяскин, кона тиезе Гастеллонь подвигонц, и генерал-лейтенанць Петр Ляпин, конань колга эсь мемуаронзон эса шназь корхтась Победань маршалсь Георгий Жуков. Чамзинскяй райононь Оцю Ремезенкать велеса шачф-касф Анатолий Кильдюшов примась участия Якстерь площадьса Победань парадса 1945 кизоня. Сятнень еткса, кие снимандакшнезе фронтонь эряфть, ульсь кинооператорсь Владимир Сущинский. «Разгром немецких войск под Москвой» советскяй лентась, коза сувасть земляконьконь кадранза, сатозе «Оскар» престижнай кинопремиять.

Мордовия Республикань Почетнай граждаттнень еткса – Советскяй Союзонь Геройсь, летчиксь-истребительсь Михаил Девятаев, Россиянь Геройсь летчиксь-космонавтсь Владимир Дежуров, Советскяй Союзонь Геройсь генерал-полковниксь Николай Антошкин, Сембе Русень Патриархне Кирилл и Алексий, академиксь Евгений Каблов, МХАТ-ть вятиец Олег Табаков и ламоц лия содаф ломаттне. 1898 кизоня машина кить строямаса лездоманкса «Почетный гражданин Саранска» лемсь максфоль рузонь государственнай деятельти графти Сергей Виттенди.

Ламонь пинге эрясь Старошайговскяй райононь Сире Акшино родовой усадьбаса поэтсь и философсь Николай Огарев. Сон лемонц каннесы регионца инь оцю Национальнай исследовательскяй Мордовскяй государственнай университетсь. 1945-1969 кизотнень вузса тонафтсь рузонь содаф мыслительсь Михаил Бахти.

2013 кизоня эсь мяленц колга получамс саранскяй прописка азсь французскяй актерсь Жерар Депардье. Ельниковскяй районцта шачемас-касомас коре российскяй кинодеятельсь Николай Бородачев, Ардатовскяйста – актрисась Ия Репина. Мордовскяй артистсь Вячеслав Акашкин 1970-це кизотнень налхксь марса Иннокентий Смоктуновскяень и Людмила Касаткинать мархта. Опернай певецть Илларион Яушевонь лемонц каннесы Саранскяйса театрась, а композиторть Леонтий Кирюковонь – музыкальнай училищась. Старошайговскяй районцта – композиторсь Георгий Сураев-Королев и республиканьконь гимнанц автороц Нина Кошелева.

Мордовиясь правас коре маряй гордость скульпторть Степан Эрьзянь работанзон инкса. Сон работась Италияса и Францияса, лама киза эрясь Аргентинаса. 1950 кизоня мрдась меки Советскяй Союзу, коса тиендсь скульптурат куломозонза 1959 кизоня. Калмаф Саранскясйа Мемориальнай калма лангса. Скульпторть лемонц каннесазь несколька художественнай музейсь, ульцятне Москуса и Мордовиять столицаса.

Ковылкинскяй районць – живописецть Федот Сычковонь родинац. Кочелаево родной велеса земляконзон эряфсна и кельгома перьфпяльсь макссть козя материал сонь творчестванцты. Мокшэрзянь художникнень еткс сувсихть Виктор Беднов, Степан Коротков, Анатолий Баргов, Петр Рябов, браттне Александр и Владимир Шадриттне, Игорь Сидельников и лиятне.

Козя асу ломаньца мокшэрзянь масторсь. Тяса шачсть марнек мирса содаф певецсь Иван Скобцов, республикань культурань заслуженнай деятельсь Владимир Ромашкин, артисткатне Нина Маркова, Нина Спиркина, Людмила Ганина, Александра Куликова, Мария Антонова…

Лувихнень кельгомаснон сатозь мокшэрзянь пистальхне Кузьма Абрамов, Никула Эркай, Яков Пинясов, Михаил Безбородов, Илья Кривошеев, Анатолий Эскин и лиятне. Кочкуровскяй районца шачсь-кассь народнай сказительницась Фекла Беззубова.

Большеберезниковскяй модась макссь странати ученайхть-физикт Радий Илькаевонь и Анатолий Астайкинонь. Косогоры велесь емла родинац дипломатть, чрезвычайнай и полномочнай посолть Валерий Кеняйкинонь. Инсарскяй крайть мархта сотфт отечественнай сейсмологиянь основательсь Александр Орлов, содаф  советскяй ученайсь, государственнай и общественнай деятельсь Петр Антропов. Краснослободскяйса шачсь рузонь просветительсь, путешественниксь и архиологсь Петр Севостьянов, Рузаевкаса – военнай гидрографсь Дмитрий Алашеев, конань лемоц максф Антарктидаса заливти, а стане жа советскяй партийнай руководительсь, дипломатсь Яков Рябов.

Советскяй государственнай деятельть Евгений Веселовскяень участиянц пингста Саранскясйа ушетф оцю промышленнай и гражданскяй строительства. Мордовиять столицанц шамаликонц тиевоманцты путкс путсь легендарнай архитекторсь Сергей Левков.

Мордовиянь тяниень пингонь краеведенияти ушетксонь путыкс ащи Иван Воронин – ученайсь-литературоведсь, писательсь и общественнай деятельсь. Сонь лемоц максф музейно-архивнай комплексти. Республикаса наукань и высшай школань инь оцю организаторкс можна азомс Григорий Меркушкинонь и Александр Сухаревонь.

Мордовиясь маряй гордость земляконзон – содаф спортсметтнень инкса. Тя олимпийскяй чемпиоттне – ласькондись Петр Болотников, хоккеистсь Иван Трегубов, гимнасттне Алексей Немов, Светлана Хоркина, бороцяйсь Алексей Мишин и лиятне. Минь региононьконь мархта кемоста сотнефт советскяй хоккеистсь и футболистсь, тренерсь Виктор Шувалов, Россиянь заслуженнай тренерхне Константин Кокурин и Леонид Аркаев, боксерсь Олег Маскаев. Эсь прославленнай землякснон – НХЛ-нь тяштть, хоккейть коряс Россиянь сборнайть лидеронц Александр Овечкинонь инкса гордость маряйхть Теньгушевскяй райононь Шокша велень эряйхне.

Тя аф сембе содаф лепне, конатнень еткса ряцок ащихть мокшэрзятне, русне и лия национальностень ломаттне, мезсь няфнесы Россиять и сонь пяльксканц – Мордовиять историяснон аф сязеви марстоньшинц.